kloane groaße erfolge

bis jetz bin i recht fleißig mit wos i mer vorgnumen hon:
2 x die woche bouldern und 1 x ins fitness

nebenbei no regelmäßig schunst eppas tian, a wenns af nocht jetzt schun um hoble 6e stock-dunkl isch. pa dem super oktober isches a prima zu mittog gongen a wian an die frische luft gian, oscholtn und a wian ostrampln. af nocht no super temperaturn zum lafn, am frein tog nix wia aussi.

i woass net wos es genau isch, ober sicherlich hot olls drzua beigetrogn, doss es mit meine rückenbeschwerdn schun besser geat. die sylvia moant es klettern isch für „mein“ problem besonders guat. und wenn es spaß a no mocht und i meistens a begleitung mit hot de mi no mehr motiviert, donn isches jo a net schwar durchzuholtn.

in erscht tog hon i schun gmoant do kimm i net weit, ober men wert jedes mol gschickter, vielleicht hot men a schun a wian mehr kroft. und wos vor a munat foscht unmeglich gschienen hot, geat jetzt problemlos… und so feiert jeder von ins so seine kloanen groaßn erfolge…

hubert von goisern – s’nix

in die leschtn wochn wors wieder ziemlich ruhig in meinem blog.  ziemlich isch wohl a wian untertriebn, weil eigentlich wors 100% tote hose.
bin zur zeit ziemlich unter strom und brauchet an 48-h-tog um olls zu drtian wos i vor hon.
inwzischn isch der schnea wieder weg und mit hobn an super herbst, mit toge de lust mochn af olls ondere lei net vorm pc zu huckn…

umso mehr hon i mi gfreit gestern um 5e oanfoch olles folln zu lossn und noch ibk zu fohrn. endlich kreag i a konzert von hubert von goisern zu segn ohne weiß gott wia weit fohn zu miassn!

wia hvg richtig sog isches pan ihm koan konzert sondern showtime pur!
und do hot er net zu viel verprochn: 2 1/2 h beste unterholtung mit super jodler, fetzign rhythmischn songs und bekanntn klassichn „balladn“, gonz noch der hvg-art.

seit 2007 singen und spielen 3 gardertolerinnen pa ihm in der band mit, wos es erklärt, doss es a viele badiotn noch ibk getriebn hot.

hvg isch net lei a super sänger und musiker (nebn der zierharmonika hot er gestern a mit gitarre, trompete, klarniett und mundharmonika sein musikalisches talent unter beweis gstellt), er konn die leit a guat ungerholtn, auffordern di pappn zu holtn wenns sein muass und konn tiefgründige gedonken in a besonderer weise ummi bringen… es isch oanfoch a genuss ihm zuazulosn. menschlisch wia musikalisch.

des wor gestern oanfoch toll und hot meine erwortungen übertoffn! a kompliment an die gesamte band. lei schode, doss es koa (!!!) cd zu kafn gebn hot, de hat i glei mitgnummen…

rekordverdächtig

04.10.2008

… isch meine erste skitour (!!!) am 4. oktober.

eigentlich hat i gsollt die tour der lia da mont afn großn roßkopf in prags führn, ober weils in freitg foscht in gonzn tog bis tiaf oi gschneit hot und es in somstig in der fria pan ins drhoam so ausgschaug hot

 

isch die tour ogsog wordn.

weil ober es wetter so super wor und die londschoft oanfoch lei traumhoft, hommer wos unfongs foscht lei als scherz gmoant wor (jo, donn nemmer morgn die skitour ausser), donn spontan am somstig in der friah umgsetzt. skitour vom keller aufi, felle augleg und die kate & i sein gstartet richtung piz sella. 

und i konn lei sogn: traumhoft. super panorama, super wetter, super konditionen de man wer woass wenn wieder vorfindn werd. so schian der austieg a wor, so toll wor donn die obfohrt pa 30 cm leichteschtem pulverschnea. i konn lei sogn SUPERSUPERSUPER!!!! (und i bin gor net traurig doss mer hobn miassn die wondertour osogn ).  wer schaug der staune…

 

  

                    

 

ps: zum glück wor leschte woche pa der besichtigung der wondertour a super wetter, donn woass i (stellts enk vor ich wor huier es erscht mol (!!!) pan pragser wildsee) wia schian es do draussn isch und für an eventuelle tour im negstn johr bescheid.