rosadura & co.

 

welcome to paradise!

seit a 2 wochn isches so richtig summer. oan tog schianer ols der ondre! do follt es orbatn schun um einiges schwarer. weil im büro huckn zu miassn wenns draußn so richtig summerlen tuat, tuat schun weah…

… und donn kreag men vun kollegn und freinde no sms-grüße vun olle meglichn gipfln, do kribbelt’s pa mir ordentlich in die haxn.

deswegn kimps in oan UND ondren tog schun vor, doss i in pc a wian friaher ausscholt und weg bin i.
radl, kletterpotschn oder laufschuach… hauptsoch aussi! 

mit foscht 29 johr bin i endlich amol mitn radl af raschötz gfohrn, stevia und pra da rì glsuchtn mi ollemol wieder, und schunst gib es no soooo viele schiane platztn wo men oanfoch amol vun olle leit fliehen konn und die ruhe geniaßn. es gibt für mi koa bessere medizin gegn stress und schlechte laune als „meine“ berge.

am sunntig wor i mit der schwester in die belluneser dolomitn, genauer gsog af der tofana die rozes, augstiegn durch’n lipella-klettersteig. jeder begeisterter kletterer wert der bestätign, doss des gebiet zu die schianstn af der gonzn welt ghert. weil in ausblick den men vun do oben hot isch gewaltig: 360° berge!

… und pa de schianen obende, de mer grod erlebn kennen muass i donn oftamol a lei unholtn, es super panorama unschaugn und in augenBLICK geniaßn: welcome to paradise!

superbike – die 2.

jo, grod viel km hon i huier in die haxn net ghob, hon mi zu oft zwischn klettern und radlfohrn entscheidn miassn, und soooo oft wors af nocht a net schian, doss men die wahl der qual ghob hot. ober des soll olls koa ausrede sein! zeit zum trainiern muass men sich lei nemmen. und es gibt jo bekanntlich koa schlechtes wetter, lei schlechte kleidung.

eigentlich hon i mi a net so letz gfühlt und doss es a wian a strapaze wert, des hon i jo vun vorign johr gwisst. ober weil es vorige johr so toll wor, wors ausser diskussion doss mer huier net wieder mit mochn.

vor a munat bin i mit der kate amol die strecke ogfohrn, weil sie huier jo in die ondre richtung gongen isch, und des wor amol schun guat zu wissn wie de isch und wos mi desmol derwortet. die strecke hot mer huier besser gfolln, a wenn die vorjohrsstrecke meiner phyischn verfossung besser entgegn kemmen isch.

doss es nochn „falso piano“ vun tobloch richtung platzwiesn donn a wian krieseln wert, hon i mer schun gedenkt… im gegensotz zu vieln ondren pedalier i jo die gonze zeit über meiner anaerobischn schwelle (!!!). ober bis ins ziel hon i’s gschofft und sell isch a schun eppas )))

hueier hots donn koane überraschungen pa der leschtn obfhort gebn, a wenn mer die leschtn mini-steigungen no amol in rest gebn hobn. ober i bin hoal ins ziel kemmen, und des isch (pa mir) jo a net sooo selbsverständlich…

zeitlich isches schwar zu sogn, ob i besser oder letzter gfohrn bin als leschtes johr. hon jo ungfongen gezielt meine ausdauer-basis zu trainiern, zumindescht tu i so als ob. ober noch 2 munat wert men do no net viel merkn, des konn i worscheinlich erst negstes johr beurteiln….

… negstes johr!?!?! … jo, sicher wieder dabei!

die dolomiten sein UNESCO weltnaturerbe!

sein  26. juni isches schworz af weiß: die  UNESCO hot die dolomiten zum weltnaturerbe erklärt.

doss mer in a paradies lebn und die schianstn berge der welt besitzn hommer eigentlich schun gwisst und für mi selber braucht sicher koane auszeichnung vun der UNESCO. hoffentlich seimer ins olle so a schun bewusst, wos für a glück mer hobn, in so a schianem platzl der erde geborn zu sein.

ober jo, do gibs holt leit, de mit an auszeichnung besser lebn und – seimer ins gonz ehrlich – es geat im grunde jo „lei“ um werbung! für insre dolomitn, für insre regionen, und olles wos domit verbundn isch. i mechat net wissn wia viele tourismerbetreiber in die negschtn poor wochn a mailing rausschickn werdn, mit der freudign nochricht: die dolomiten sein UNESCO welnaturerbe! es sein im moment olle gonz euphorisch. und a jeder denkt schun wia er de nochricht am bestn für sich selber nutzn konn. i hoff lei doss men sich net allzuviel vun dem gonzn  erwortet… ok, es gibt bestimmt a wian a werbung, ober ob an auszeichung alloan hilft die momentane wirtschoftskrise zu trotzn???

donn sein ihre, de moanen wenn mer weltnaturerbe sein, ewige problematikn wia z.b. der verkehr af die passstroßn endlich an ende findet. ober ob des net no mehr leit in die dolomitn führt?!?!?!?. doss UNESCO weltnaurerbe sein a bestimmte restriktionen und striktere regeln mit sich bringt, des wert der oane oder ondere in die negstn johr sicher no zu spürn kreagen. 

mir isches lei recht, wenn mer weltnaturerbe sein. wichtiger isch mer ober doss mir de do in die dolomitn lebn insren lebensraum schützn und die wirtschoflichn aspekte a amol zweitranging sein lossn, drmit die hohe lebensqualität a no für insre kinder erholtn bleibt, mit oder ohne auszeichnung.